Praqa şəhərdə “Mədəniyyətlərarası münasibətlər və etnik azlıqların Çexiya Respublikasının dövlət hakimiyyəti orqanları ilə qarşılıqlı əlaqəsi” mövzusunda dəyirmi masa keçirilib.

 

Tədbir Çexiyada yaşayan müxtəlif milli icmaların nümayəndələrini, ictimai təşkilatları və ekspertləri bir araya gətirərək mədəniyyətlərarası dialoqun inkişafı, qarşılıqlı anlaşmanın möhkəmləndirilməsi və etnik icmalarla dövlət institutları arasında əməkdaşlığın genişləndirilməsi məsələlərinin müzakirəsi üçün platforma rolunu oynayıb.

Dəyirmi masanın təşəbbüskarı SPD (Azadlıq və Birbaşa Demokratiya) siyasi hərəkatının nümayəndəsi Sergey Zuyev olub. Tədbir çex siyasətçisi Milan Urbanın dəstəyi ilə təşkil edilib.

Müzakirələrdə Azərbaycan, Qazaxıstan, Qırğızıstan, Pakistan, Əfqanıstan, Ukrayna, Rusiya və Çexiyanı təmsil edən ictimai, mədəni və siyasi təşkilatların nümayəndələri iştirak ediblər.

Tədbirdə diplomatik korpus da təmsil olunub. Fəxri qonaqlar sırasında Pakistanın Çex Respublikasındakı səfiri Shehryar Akbar Khan və Qazaxıstanın bu ölkədəki konsulu Timur Akhmetzanov yer alıblar.

Dəyirmi masada milli azlıqların dövlət və bələdiyyə qurumları ilə qarşılıqlı əlaqəsi, müxtəlif icmalar arasında əməkdaşlığın inkişaf etdirilməsi və mədəniyyətlərarası dialoqun genişləndirilməsi məsələləri əsas müzakirə mövzusu olub. İştirakçılar ictimai və mədəni layihələrin həyata keçirilməsi sahəsində təcrübə mübadiləsi aparıb, milli icmaların cəmiyyət həyatında daha fəal iştirakına şərait yaradan təşəbbüsləri nəzərdən keçiriblər.

Müzakirələr zamanı milli icmaların mədəni irsinin qorunması, təhsil və maarifləndirmə layihələrinin dəstəklənməsi, eləcə də etnik azlıqların ictimai həyatda daha aktiv iştirakının təşviqi məsələlərinə xüsusi diqqət yetirilib.

Azərbaycanı tədbirdə “Land of Fire” cəmiyyətinin təsisçisi, Azərbaycan Diasporunun Şərqi Avropa üzrə Koordinasiya Şurasının Çex Respublikası üzrə koordinatoru Fərid Əmirəliyev təmsil edib.

Fərid Əmirəliyev çıxışında xalqlar arasında sülhün, dostluğun və qarşılıqlı hörmətin qorunmasının müasir dünyanın ən vacib dəyərlərindən biri olduğunu bildirib. O qeyd edib ki, müxtəlif milli və etnik icmalar arasında dialoqun inkişaf etdirilməsi cəmiyyətlərdə sabitliyin, qarşılıqlı anlaşmanın və birgə inkişafın əsas şərtlərindəndir.

Azərbaycanın multikulturalizm və tolerantlıq ənənələrindən danışan Fərid Əmirəliyev vurğulayıb ki, Azərbaycan müxtəlif millətlərin və dini icmaların əsrlər boyu qarşılıqlı hörmət və əməkdaşlıq şəraitində yaşadığı nümunəvi ölkələrdən biridir. Onun sözlərinə görə, mədəniyyətlərarası əməkdaşlığın gücləndirilməsi beynəlxalq münasibətlərdə etimadın, sabitliyin və ictimai həmrəyliyin möhkəmlənməsinə xidmət edir.

Tədbir çərçivəsində Çexiyada Milli və Etnik Azlıqların Dəstəklənməsi Assosiasiyasının yaradılması təşəbbüsü də təqdim olunub. Bildirilib ki, yeni təşkilat milli icmaların maraqlarını təmsil edən qurumlar arasında əməkdaşlığın koordinasiyasına, birgə layihələrin həyata keçirilməsinə, mədəni mübadilənin inkişafına və dövlət institutları ilə qarşılıqlı fəaliyyətin gücləndirilməsinə xidmət edəcək.

Çex siyasətçisi Milan Urban çıxışında dövlət institutları ilə milli icmalar arasında açıq dialoqun vacibliyini vurğulayaraq bildirib ki, bu cür görüşlər mövcud çağırışların müzakirəsinə və qarşılıqlı hörmətə əsaslanan həll yollarının birgə axtarılmasına imkan yaradır.

Tədbirin təşəbbüskarı Sergey Zuyev isə müxtəlif millətlərin nümayəndələri, ictimai təşkilatlar və dövlət qurumları arasında konstruktiv əməkdaşlıq üçün platforma formalaşdırmağın əsas məqsəd olduğunu qeyd edib. O bildirib ki, belə əməkdaşlıq ictimai həmrəyliyin möhkəmlənməsinə və mədəniyyətlərarası anlaşmanın inkişafına töhfə verir.

Dəyirmi masanın yekununda iştirakçılar bu formatda görüşlərin müntəzəm keçirilməsinin vacibliyini vurğulayaraq, mədəniyyətlərarası əməkdaşlığın inkişafı və müxtəlif milli icmalar arasında təcrübə mübadiləsinin davam etdirilməsində maraqlı olduqlarını bildiriblər.